Link açıqlığı

Aqmescit – Qarasuvbazar rayonı Arğın köyünde yaşağan Zore Fattayeva sürgünlik faciasını balalıq çağında qarşıladı.

Öyle oldı ki, sürgün etilgen künü evde ana-babası yoq edi. Zore hanımnıñ babasını qurucılıq işlerine yolladılar, anası ise soylarına musafirlikke ketken edi, balalar evde özleri qalğan ediler.

«Bir araba keldi, asker balalarnı toplap, arabağa oturttı. Bizlerni vagonlar ile sürgün ete ediler», – tarif ete Zore hanım.

Zore Fattayeva yaşlığında
Zore Fattayeva yaşlığında

Şu arada evge qaytqan anası da sovet askerleriniñ ellerine tüşti. Balalarnı endi tek demir yol stantsiyasında taptı.

«Anamnı trenlerge maşina ile ketirdiler. Bizni körgende, maşinadan atladı ve bizge taba çaptı. Onı tuttılar, ebet, silâ ile qorquta ediler. Amma soñra bizge yolladılar. Böylece anası balalarına kelip yetti», – dep hatırlata Zore Fattayeva.

21 künden soñ mal taşığan, bitli vagonlarda qoranta Özbekistannıñ Navoyi vilâyeti Kerman qasabasına keldi. Zoreniñ anası birden pamuq tarlararında işke başladı, soñra hastahanede çamaşır yuvucı olaraq çalıştı. 1945 senesi aile başı tapıldı – o, tuvğanlarına tanışını yolladı, Zoreni babasına Mayli-Say qırğız şeerine ketirdiler.

Zore Fattayeva
Zore Fattayeva

Zoreniñ babası qurucılıqta dülger olaraq çalışa edi. «Balaban çadırlarda yaşay edik, ayrı-ayrı raflar bar edi. Üst raflarda – qadınlar, aşada – erkekler yuqlay edi. Birazdan babam çalaşnı qurа, şu sene anam bizge köçip kele. Nice yıllar devamında çalaşta yaşap keldik. Soñra küçük evçikni qurdıq», – dey Zore Fattayeva.

Zore Fattayeva aqayı ve balaları ile
Zore Fattayeva aqayı ve balaları ile

Birazdan babası kömür ocağına işke keçti, anası ev bikesi oldı. Yedi yaşında Zore mektepke kete.10 sınıfnı bitirgeninden soñ Özbeksitanğa iş qıdırmağa yol ala. Ferğanada pamuq fabrikağa işke kire. Soñra Namanganğa köçe, mında kassacı olaraq çalışa ve aynı zamanda muasebecige oquy. Bir qaç yıldan soñ Zore Fattayevanıñ anası kelip, onı Qırğızistanğa keri alıp ketire.

«O dedi: oqumağa isteseñ, bizde tibbiy oquv yurtu açıla, anda kirersiñ. Men keri Mayli-Sayğa qaytam, 1963 senesi tibbiy aliy oquv yurtuna kirem. Üç yıldan soñ feldşer tasilini alam ve uzun vaqıt devamında hastahanede çalışam», – tarif ete Zore hanım.

Zore Fattayeva ğurbetlikte yaşar eken, Qırımğa qaytmağa arz ete. Vatanğa aqayı ve balaları ile tek 2001 senesi qaytıp kele.

XS
SM
MD
LG