Avropa Şurasınıñ Parlament Assambleyası (PACE) reisi Anne Brasseur bildirdi ki, Debaltsevo civarındaki cenk uruşlarınıñ devam etmesi ateş toqtatılması aqqında Minsk añlaşmalarınıñ bozulması sayılmaqta, – dep haber ete Radio Svoboda.
«Keçken afta Minskte tizilgen añlaşmalar ve Birleşken milletler teşkilâtınıñ Havfsızlıq şurası tünevin qabul etken rezolütsiyağa baqmadan, Ukraina şarqında zorbalıq devam etkenine yazıqsınam. Uruşlar Debaltsevoda eñ küçlü oldı, anda Rusiyege qoltutqan separatistoyer regionnı nezaret altına almağa tırıştılar», – dep ayttı Brasseur.
PACE reisi zıddiyet taraflarını ateş toqtatılmasına riayet etmege çağırdı. Fevral 12-de Ukraina, Rusiye, Frenkistan ve Almaniya liderleri Donbassta fevral 15-ten itibaren ateş toqtatılması ve ağır silâ çekilmesi aqqında añlaştılar. Rejim er daim bozulmaqta, taraflar bir-birini qabaatlap, kendi qabaatını red eteler.
Radio Svoboda mühbiri bildire ki, saat 11:00 Artemovsk hastahanesine Debaltsevoda yaralanğan yüzden ziyade asker ketirildi.
Prezident Petro Poroşenkonıñ aytqanına köre, Debaltsevo civarındaki uruşlar neticesinde 30 asker yaralandı. Ukraina Silâlı quvetleri Debaltsevo nı terk eteler. Saat 13:00 bölüklerniñ 80% çıqarıldı. Bundan soñra Debaltsevo vaziyeti aqqında malümat olmadı.
