Qırımlılar alâ daa telefon bağı ile problemlerge rastkele. Müşteriler yalıñız Qırım nomeralarına ve Rusiye operatorlarınıñ nomerlarına telefon ete bileler, dep bildire Qırım.Aqiqat mühbiri.
Qırımda telefon kodu deñişmedi: Aqmescitniñ ev nomeralarına telefon etmek içün 0652 basmaq kerek. Bunıñ ile, qabul etilgen nomeralarda «Ukrtelekomnıñ» milliyleştirüvinden soñ peyda olğan yañı Qırım kodu – 365 kösterile.
Rusiye şeerlerinden Qırım ev nomeralarına telefon etmek imkânsız. Qırım.Aqiqatqa 109 nomerası boyunca bildirilgeni kibi, Qırımda halqara ağı çalışmay.
«Halqara bağı söndürilgen», – dep taşladı operator.
Qırımdan qıtaiy Ukrainağa da telefon açmaq imkânsız. Şeer nomeralarına telefon açqanda – sessizlik kele, cep telefonlar ile aynı vaziyet.
Qırım matbuat vastalarında endi bağnıñ yañı qaidelerini bastıralar. Böylece, ukrain şeerlerine telefon etmek içün, 00 – 380, soñra şeer kodu ve telefon nomerasını basmaq kerek. Amma amelde ise böyle sistema Qırımda çalışmay.
Fevral 10 künü Qırımda «Ukrtelekom» ukrain operatorınıñ bağı yoq odı. Qırım akimiyeti buña alâqası olmağanını bildirdi. Yarımadada «Ukrtelekom»nıñ eki bölügi çalışa edi: biri Aqyarda, digeri – Aqmescitte. «Ukrtelekom»nıñ Qırım bölügi Qırım qullanıcılarınıñ 80% hızmet ete edi. Şirketniñ saibi – Rinat Ahmetov.
İşğal etilgen Qırımnıñ Devlet Şurası fevral 11 künü «Ukrtelekom» Qırım filialınıñ «milliyleştirüvine» qol tuttı. Qırımnıñ baş nazir muavini Dmitriy Polonskiy aytqanı kibi, milliyleştirilgen «Ukrtelekom»nı endi «Krımtelekom» idare etecek.
