Bağçasarayda yerleşken İsmail Gasprinskiyniñ Memorial müzeyi «İsmail Gasprinskiyniñ meyva bağçasınıñ yañıdan yaratuvı» aktsiyasını keçirmege azırlana.
Bunı Qırım.Aqiqat mühbirine müzeyniñ ilmiy hadimi Elmira Abibullayeva bildirdi.
«Malüm ki, İsmail Gasprinskiyniñ büyük meyva bağçası bar edi. Alma ve armut tereklerniñ sayısı ziyade edi. Bugünge bağça territoriyası eki qat eksildi. Aktsiyamız insanlarğa bağçanıñ yañıdan yaratuvına qoşulmağa imkân berir. Saçılğan er bir terekke onı oturtqan insannıñ adı ve soyadı yazılğan levhaçıqlar asılacaq», – dedi Abibullayeva.
Onıñ sözlerine köre, işbu aktsiya çerçivesinde olğan daa bir mesele – Qırım meyva terekeleriniñ eski cınıslarını hatırlamaq ve meydanğa ketirmektir.
«Eküv içün nevbetteki cınıslar saylanıldı: «Bal armut» armutı, «Kertme», «Makami» almaları, «Yüzüm-erik» erigi, qızılçıq», – dep qayd etti müzey hadimi.
Tedbirge qoşulmaq içün arizalarnı İsmail Gasprinskiyniñ Memorial müzeyinde mart 12-ne qadar qabul etecekler. Tedbir 2015 senesi mart 25-de keçirilecektir.
İsmail Gasprinskiy – qırımtatar maarifçisi, medeniy ve içtimaiy-siyasiy erbabı, yazıcı, oca. Qırımtatarlar arasında zemaneviy ğayelerniñ teşviqatçısı, ananeviy islâm medeniyetlerini zemaneviyleştirgen bir insan olaraq bellidir.
