Yuqarı Rada reisi Vladimir Groysman Ukrainanıñ devlet akimiyeti organlarınıñ yanında Rusiye Federatsiyası kütleviy haber vastalarınıñ jurnalistleri ve tehnik hadimleriniñ akkreditatsiyası toqtatılması aqqında qararnı imzaladı.
Radio Svoboda bildire ki, fevral 12-de Yuqarı Rada işbu qarar leyhasına qoltuttı.
Leyha müellifi, «Petro Poroşenkonıñ blokundan» deputat İrina Friz dedi ki, işbu qararnıñ maqsadı informatsion telükelerge yol bermemek, çünki, onıñ aytqanına köre, Rusiyeniñ bazı kütleviy haber vastaları informatsion cenkni alıp baralar.
Keçken seneniñ dekabr ayında Ukraina havfsızlıq hızmeti 83 Rusiye jurnalistine Ukrainağa kirişini yasaq etti. UHH yolbaşçısınıñ mesleatçısı Markiyan Lubkivskiyniñ bildirgenine köre, Ukraina havfsızlıq hızmeti mezkür 83 Rusiye jurnalisti ve olarnıñ çalışqan yerlerini terroristik faaliyetke qoltutuv olaraq tanımaqta.
