Qırımda bayram künleri olaraq ilân etilgen mart referendumı ve Ğalebeniñ 70 yıllığı künlerinde havfsızlıq tedbirleri quvetleştirilecek. Bunı Federal havfsızlıq hızmeti Qırım idaresiniñ yolbaşçısı Viktor Palagin Qırım prokuraturasınıñ muşaveresinde bildirdi, – dep haber ete RİA Novosti.
Neşirniñ malümatına köre, Qırım prokurorı Natalya Poklonskaya işbu teşebbüske qoltuttı.
Qırım «Devlet şurasınıñ» deputatları mart 16-nı – «referendum» keçirilgen kününi – tatil olaraq ilân ettiler.
Endiden soñ bu künni «Qırım Cumhuriyetiniñ künü» olaraq qayd etecekler.
Mezkür qanun leyhası dekabr 10-da Qırım «parlamentiniñ» toplaşuvında birinci oquvda qabul etildi. Toplaşuvğa kelgen 65 deputattan 65 kişi vesiqağa qoltuttı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
