Link açıqlığı

Ukraina tasil ve ilim nazirligi işğal etilgen Qırım ve zapt etilgen Donbass mezunları içün Tışqı mustaqil imtianlarına qayd işleriniñ müddetini arttırdı. Nazirlikniñ resmiy saytında berilgen malümatqa köre, vaqtınca Ukraina tarafından nezaret etilmegen yerlerniñ mezunları aprel 20-ne qadar ZNO imtianlarına qayd etile bileler. Böylece, olarnıñ ukrain tili ve edebiyatı testleri iyün 9-da, diger fen testleri ise cedvel boyunca (iyün 3-26 künleri) keçirilecek.

Mezun belli sebeplerden ukrain tili ve edebiyatı testlerine kelip olamasa, onı bu imtiannı 2015 senesi iyün 27-de bermek imkânı bar.

Devlet akimiyeti nezaret etmegen Donetsk ve Lugansk vilâyetleriniñ bazı mesken yerleriniñ, em de Qırım ve Aqyarnıñ mezunları fevral 20-ne qadar ZNO imtianlarına qayd etilgen mezunlar er kesken beraber imtianğa kirecekler, şu cümleden aprel 24-te – ukrain tili ve edebiyatı testlerine.

Bunıñ kibi imtianlar cedveli nazirlikniñ resmiy saytında derc etildi.

Malüm ki, Rusiye tarafından işğal etilgen Qırım, «DNR» ve «LNR» nezareti altında bulunğan Donbass regionlarınıñ mezunları ukrain attestatlarını alıp, tışqı mustaqil imtianlarğa kirip, Ukraina aliy oquv yurtlarında tasil ala bileler.

Ukraina tasil ve ilim nazirligi Donbass ve Qırım talebelerine ğıyabiy şekilde tasil berecek, devlet imtianlarını qabul etecek ve attestatlarnı berecek mektepler cedvelini aydınlattı. Mekteplerniñ cedvelini Ukraina Tasil nazirliginiñ saytında baqmaq mümkün.

XS
SM
MD
LG