Federal havfsızlıq hızmetiniñ Qırım idaresi Ukraina Oşçadbankınıñ Qırım bölüginden altın ve para hırsızlığı aqqında cinaiy işni taqiq etmekte, şeklengen insanlardan biri – Qırım baş naziriniñ sabıq muavini Rustam Temirgaliyevdir, dep bildirdi FHH Qırım bölüginiñ yolbaşçısı Viktor Palagin Qırım prokuraturasınıñ toplaşuvında, dep haber ete İnterfaks.
«Temirgaliyev ve nazirler şurası reisiniñ mesleatçısı Vasilçenkoğa qarşı Oşçadbank parası ve altın hırsızlığı boyunca – 300 kg ziyade (iş taqiq etilmekte – muar)», – dep tekrarlay Palaginniñ aytqanlarını neşir.
Onıñ aytqanına köre, Oşçadbanknıñ Qırım bölüginden 250 mln ruble hırsızlandı, paranıñ bir qısmı keri qaytarıldı, daa bir qısmı ise – yoq, dep qayd etti Qırım FHH yolbaşçısı.
Temirgaliyev Qırım işğalinden soñ Qırım baş naziriniñ muavini olğan edi, lâkin 2014 senesi iyün ayında istifağa yollanıldı. Bundan soñra Temirgaliyev Aksenovnıñ hadimlerden tış mesleatçısı oldı, lâkin bu vazifede de çoq bulunmadı.
Qırım siyasetşınası Aleksandr Formançuk Temirgaliyevniñ işten boşatılmasını Qırım.Aqiqatqa izaatlap, baş nazirniñ sabıq muavininiñ Aksenovğa canı ağırğanını ayttı ve qabarcılıq aqqında hatırlatqan edi: «Anda belli bir qabarcılıq meseleleri mevcut, – dedi Formançuk. – Aksenov bir şey bile, lâkin Temirgaliyevniñ para, altın ile ne yapqanını şimdilik aydınlatmağa istemey. Mence, bunıñ devamı olacaq, maalesef».
Temirgaliyevniñ soñki tayinlenmesi – Qazahistan Cumhuriyetinde Tataristan Cumhuriyetiniñ vekâletli temsilcisidir.
