Link açıqlığı

Ukraina şarqında cenk uruşları neticesinde beş biñden ziyade insan elâk oldı, aman-aman 11 biñ kişi yaralandı, dep bildirdi Ukraina baş naziriniñ mesleatçısı Daniil Lubkivskiy.

Onıñ aytqanına köre, kerçek raqamlar bulardan daa çoq ola bile. Lubkivskiy «Kremlniñ qara kitabını» taqdim etip, Ukraina terrorizmge qarşı tedbirler ve devlet imayesine er kün tahminen yüz million grivnanı sarf etkenini bildirdi. Onıñ qayd etkenine köre, Rusiye boyevikleri ve yerli separatistler biñden ziyade energetik müessisesini bozdı ve olarğa zarar ketirdiler.

«Kremlniñ qara kitabında» olğan malümatqa köre, Qırım işğali ve Donbassnıñ zapt etilmesi neticesinde Ukraina iqtisadiyat potentsialınıñ aman-aman 20 fayızını coydı, 150 kömür ocağından 115 danesi «DNR» ve «LNR» nezareti altına qaldı. Bu sebepten kömürniñ çıqarılması 35 fayızğa eksildi, dedi Lubkivskiy.

«Kremlniñ qara kitabı» 5 tilde (ukraince, inglizce, rusça, almanca ve frenk) neşir etilip, eñ yaqın vaqıtta Ukrainada çalışqan diplomatik missiyalar ve halqara teşkilâtlarnıñ temsilciliklerine berilecek.

BMT malümatlarına köre, Ukraina şarqında aprel ayından itibaren zıddiyet neticesinde 5350 insan elâk oldı.

XS
SM
MD
LG