Aqyarda, fevral 23 künü, İsyancılar meydanında 1918 senesi bolşevikler tarafından vahşiycesine öldürilgen qırımtatar erbabı, Qırım halq Cumhuriyetiniñ birinci yolbaşçısı, 1-nci Qırımtatar Milliy Qurultayınıñ teşkilâtçısı, Qırım, Aqrusiye, Poloniya ve Litvaniya musulmanlarınıñ müftisi Noman Çelebicihanğa bağışlanğan hatıra tedbiri keçirilecek. Tedbir erbapnıñ hatıra tahtası yanında ötkerilecek.
Bunı Qırım.Aqiqat saytına Aqyar regional Meclisinde bildirdiler.
Aqyar qırımtatar medeniy merkeziniñ reisi Diana Asanova aytqanı kibi, tedbirniñ keçirilmesi içün zaruriy izinler endi alınğan eken.
«Qırım ve qırımtatarlarnıñ tarihında meşur insannıñ hatıra künüdir. Cemaatçılıq, faaller toplanır, balalar şiir, biz dua oqurmız. Ümüt etemiz ki, bizge Aqyarnıñ diger millet vekilleri de qoşulır», – dedi o.
Aqyar regional meclisi Qırımnıñ diger region sakinlerini de saat 11-de başlanacaq tedbirde iştirak etmege çağıra.
Evel Qırımtatar Milliy Meclisi qırımtatar erbabı hatırasına tedbirlerni keçirmege niyetini bildirgen edi, amma akimiyet tarafından yasaqlarnıñ ola bilecegi aqqında da qayd etken edi.
Mecliste qırımtatar faalleriniñ yaqalanuvı bu kibi kütleviy tedbirlerde olarnıñ iştiragine yol bermemek maqsadı ile yapılğanını tüşüneler.
