Link açıqlığı

Nijniy Novgorodnıñ halqara ava limanı uçuşlarnıñ yaz cedveli şekillendirilmesini aydınlatıp, Qırım ava seferleri olacağını bildirdi. Ava limanınıñ matbuat hızmeti bildire ki, Aqmescit ava seferleri aftada üç kere, salı, cumaertesi ve bazar künleri olacaq.

«Yaz cedveli 2015 senesi mart 29-dan itibaren Striginoda tolusınen işke tüşürilecek», – dep qayd ettiler ava limanınıñ matbuat hızmetinde.

Cedvelge binaen, «Ural ava yollarınıñ» ilk Aqmescit uçuşı mayıs 16-da olacaqtır.

«Mayıs 19-dan itibaren salı künleri, mayıs 31-den itibaren de bazar künleri ava seferleri olacaq. Böylece, yaz mevsimi başlağanına qadar Striginodan Qırımğa aftada üç kere kelip çıqmaq mümkün olacaq.

Yol süresi 2 saat 45 daqqanı teşkil etecek, uçuşlarda Airbus A320 uçaqları qullanılacaq. Biletler endi satıla», – aytıla beyanatta.

Malüm olğanı kibi, Ukrainanıñ Devlet aviatsiya hızmeti noyabr 19-da Rusiye ava şirketleriniñ Ukraina ava boşluğını bozğanları içün cezalar aqqında 1923 qararnı qabul etti. İşğal etilgen Qırımnıñ ava boşluğı aqqında laf kete. Cezalarnıñ miqdarı 261 million 528 biñ grivnanı teşkil etmekte.

2014 senesi avgust ayında Ukraina devlet aviatsiya hızmeti Rusiye ava şirketlerini 106 mln grivnağa cezalağan edi.

XS
SM
MD
LG