Qırımda İçki işler nazirligi, Fevqulâde vaziyetler hızmeti ve Federal havfsızlıq hızmeti iştirak etecek terrorizm ile küreş tedbirleriniñ başlanmasını ilân ettiler. FHH matbuat hızmetiniñ malümatına köre, talimler fevral 16-20 künleri Aqmescitniñ Merkeziy rayonında keçirilecek.
«Talimlerde Qırım Cumhuriyetiniñ İİN, FVH, FHH idare quvetleri, akimiyet ve devlet idare organları iştirak etmekte. Talimlerniñ maqsadı – terroristik bir telüke peyda olsa, şu cümleden adamlar toplu olğan yerlerde, uquq qoruyıcı ve mahsus hızmetlerniñ areketlerinde işbirlik usullarını ögrenmektir», – dep bildire FHH Qırım idaresiniñ matbuat hızmeti.
Malüm olğanı kibi, Qırımda Rusiye askerleriniñ kenar imaye brigadası terkibinde talimleri keçirilmekte. Tedbirlerde tahminen 600 arbiy ve 50 dane cenk tehnikası qullanılmaqtadır.
