Aqyar şeer mahkemesi Hizb ut-Tahrir teşkilâtınıñ faaliyetinde iştirak etüvde qabaatlanğan Ruslan Zeytullayevniñ tevqifi aqqında qararnı lâğu etmedi, dep haber ete 15 minut saytı.
Adliyeci Emil Kürbedinov neşirge bildirdi ki, Aqyar şeer mahkemesinde fevral 16 künü itiraz muracaatı baqılğanda, mahkemeci onı deñiştirmemek qarar aldı.
O şunı da qayd etti ki, toplaşuvda ne yaqalanğan şahıs, ne onıñ imayesi bar edi.
«Qaba bozuluvdır, qabaatlanğan insan toplaşuvda mıtlaqa bulunmalı», – dedi adliyeci.
Ruslan Zeytullayev – yanvarniñ soñunda Federal havfsızlıq hızmetiniñ hadimleri trafından yaqalanğan üç musulmandan biridir. Mahkeme o vaqıt oña 2 ayılq apis cezasını belgiledi.
Hizb ut-Tahrir teşkilâtınıñ faaliyeti Rusiye Federatsiyasında yasaq etilgen. Erkekni Rusiye Federatsiyası Cinaiy Kodeksiniñ 205,5 maddesiniñ bozuluvında qabaatlaylar («Terroristik teşkilâtnıñ teşkil etüvi ve işbu teşkilâtnıñ faaliyetinde iştirak etüv»).
