Rusiye musulman cemiyeti Rusiye prezidenti Vladimir Putin adına camini qurmağa istey ve Moskvada qurucılıqqa topraq damartasını soray.
İşbu teklif ile Moskva şeer yolbaşçılığına «Rusiyeniñ birleşken islâm kongressi» Merkezleştirilgen diniy teşkilâtınıñ reisi Şavkat-hacı Avâsov muracaatta bulundı.
«Biz – Rusiyeniñ vatanperver musulmanları – memleketniñ yolbaşçılığından Moskvada Putin Vladimir Vladimiroviçniñ adına cami qurmaq içün izin soraymız. Onıñ adı çoq milletli Vatanımıznıñ halqları arasında asırlarca saqlanmalı. Bunıñ ile Moskva şeer başına S.S.Sobâninge cami qurucılığına topraq damartasını ayırmağa ricada bulunamız», – denile muracaatta.
Şavkat-hacı Avâsov şunı dey ki, «vatanperver musulmanları» Rusiye prezidentine öz destegini, Qırım meselesinde de, şu cümlede, köstermek kerekler.
«Memleket içün bu ağır vaqıtları birleşip, Putin Vladimir Vladimiroviçke qol tutmaq kerekmiz, Qırımnıñ Rusiyege qoşuluvı aqta qararına qol tutmalımız, Qırım er vaqıt Rusiye territoriyası edi.
Bizimce, Vladimir Vladimiroviç Putin – bizge Allahtan bağışlanğan efsaneviy insandır», – denile beyanatta.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
