Link açıqlığı

«Larişes» Qırım tarihiy müzeyiniñ tesisçisi ve müdiri Güliver Altin onıñ namzeti Bağçasaray tarihiy medeniy qoruğınıñ (BTMQ) reberi vazifesine kösterilgenini red etti.

«Men BTMQnı idare etecegim aqqında fikir kimniñ aqılına kelgenini bilmeyim. Müzey aqqında qanunğa köre, men Qırım tarihiy müzeyiniñ tesisçisi olam. Bir müzeyniñ tesisçisi digeriniñ reberi ola bilemi?», – dep ayttı Altin Qırım.Aqiqatqa.

«Bizler – serbest müzey, devletten mustaqil olğanımızdan ğurur duyamız, aynı vaqıtta bizler – müzey müessisesimiz. Men devlet hızmetçisi bile olamam, çünki, şaqa etkenimiz kibi, bu mustaqilligimizge tesir eter. Müzeyde azatlıq müiti ğayet müimdir. Qoruq müdiri ise bütün devlet sistemasına boysunmalı», – dedi o.

Altinniñ qayd etkenine köre, Bağçasarayda üç buçuq yıllıq işi devamında qoruqnıñ reberligi dörtünci kere deñişe. Onıñ aytqanına köre, bunıñ kibi müessiselerde reberlerniñ sıq-sıq deñişmesi «müzeyge menfiy tesir ete».

Malüm ki, Qırım medeniyet nazirligi Bağçasaray tarihiy medeniy qoruğınıñ yañı baş müdirini taqdim etmege azırlana. Qırım.Aqiqatnıñ qaynaqları bildire ki, namzetler arasında qoruqnıñ sabıq baş müdiri Yevgeniy Petrov, «Hanlar sarayı» qırımtatarlarnıñ tarih ve medeniyet müzeyiniñ sabıq müdiri Server Ebubekirov, Qırım medeniyet, sanat ve turizm universitetiniñ ocası Yuriy Mogariçev, «Larişes» müzeyiniñ tesisçisi Güliver Altin, em de TRK «Krım» baş prodüsseri Böris Yemets bar.

Hatırlatamız, 2015 senesiniñ başında Bağçasaray tarihiy medeniy qoruğınıñ bütün hadimleri işten boşatıldı, ilmiy hadim ve qılavuzlarnıñ yalıñız bir qısmı işke tekrar qabul etildi.

Keçken seneniñ dekabr ayında BTMQ baş müdiri vazifesinden Elmira Ablâlimova boşatıldı. Ömür arqadaşı olğan Qırımtatar Milliy Meclisiniñ reis muavini Ahtem Çiygoz bunı siyasetnen bağladı.

XS
SM
MD
LG