Link açıqlığı

Qırımda «yarımadanıñ yarı cenk vaziyetinde» «duşman telekanallarına» yer yoq, – bunı Qırım yolbaşçısı Sergey Aksenov ATR qırımtatar telekanalınıñ işi aqqında aytıp bildirdi. «15 minut» saytı bildire ki, cuma künü, fevral 13-te, Aksenov Bulğaristannıñ «Ataka» sağ firqası eyyetiniñ Qırım ziyareti munasebetinen keçirilgen matbuat konferentsiyasında ATR qırımtatar telekanalını tenqit etti.

Aksenov yarımadada radiostantsiya ve telekompaniyalarnıñ vaziyetini aytıp, Qırım akimiyeti «Qırımnıñ radiostantsiyaları ve telekanalları yahşı çalışmasını istegenini» bildirdi.

«Lâkin biz bazı telekanallar tarqatqan yañlış malümatqa qarşı çıqamız, bazı vaqıtları ayrı mevzularda açıq-aydın yalan aytalar», – dedi Aksenov, ve ATR qırımtatar telekanalı aqqında aytıp başladı.

Onıñ aytqanına köre, «bir de bir vaqia daa olmadı, onı ise endi bam-başqa şekilde aydınlattılar».

«Asılında ise, bazı vatandaşlarğa Qırımnıñ Ukrainağa qaytaralması ile bağlı ümüt bergen kütleviy haber vastalarınıñ işi cumhuriyette olmaycaq. Bugün ealini şaşmalatqan, vaziyetni yañlış aydınlatqan duşman kütleviy haber vastaları nege kerek»,– dedi Aksenov.

«Bazıları qırımtatar ealisini şaşmalatmağa begenedirler, lâkin telekanal ya da radio olsun, birden aytam, bizler milletlerara munasebetlerde kerginlikke yol bermeycekmiz. Bugün yarı cenk vaziyeti üküm sürmekte, sıñırda aman-aman cenk zıddiyeti, onıñ içün af etiñiz – saylamaq kerek. Qırımlı olsañız, namuslı olıp, Qırım ile soñuna qadar oluñız – men böyle tüşünem», – dep ayttı Qırım baş naziri.

ATR qırımtatar telekanalınıñ reberligi Sergey Aksenovnıñ qabaatları ile razı degil.

«Bizler özümizni duşman telekanalı olaraq saymayıq, çünki bizler akimiyetniñ ne dostu, ne de duşmanı olamız. Bu kütleviy haber vastalarınıñ vazifesi degil», – dep ayttı telekanalnıñ baş müdiri Elzara İslâmova.

Onıñ bildirgenine köre, ATR «vaziyetni kerginleştirmeyip, Qırımda olğan problemler aqqında ayta». «Olarnıñ olmağanını, mence, kimse aytmaz», – dedi Elzara İslâmova.

Yanvar 26-da ATR qırımtatar telekanalına silâlı insanlar sürip kirdi. Haberlerniñ acele yayınında alıp barıcı silâlı insanlar Aqmescitte yerleşken ATR qırımtatar telekanalına bir yıl devamında olıp keçken adiselerniñ video malümatını, şu cümleden, fevral 26 künü Qırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün kelgenini bildirdi

Ukraina, Türkiyeniñ resmiy akimiyetleri, em de OSCE, PACE ve Avropa Birligi kanalda keçirilgen tintüvni takbih ettiler.

XS
SM
MD
LG