Yalta sakinlerini fevral 13-te aqşam saat beşlerde deñiz tarafından kelgen patlav sesi qorquttı. Şaatlarnıñ aytqanına köre, ses dalğası Nikita qasabasına qadar keldi, – dep haber ete Qırım.Aqiqat mühbiri.
Şaatlarnıñ bildirgenine köre, patlav sesi Yalta sailinde 20 kilometrlik radiusta eşitildi. O, o qadar küçlü edi ki, Yalta ayvanat bağçası rayonında mesken evlerniñ camları tasırdadı ve maşinalarnıñ signalizatsiyası çalmağa başladı. Yerli sakinler deyler ki, patlav Gurzufta da eşitildi.
Şaatlar deñizde bir patlavnı körmediler, bu sebepten onıñ açıq deñizde yüz bergenini tüşüneler.
Yaltanıñ bazı sakinleri patlavnı Qırım yalısında Rusiye Federatsiyası silâlı quvetleriniñ keçirilgen talimleri ile bağlaylar, bazıları da – yer teprenüvi arfesinde olğan serovodorodnıñ suvaltı patlavı aqqında aytalar.
Resmiy strukturalar vaqianı izaatlamaylar.
