Link açıqlığı

Rusiye Ukraina şarqında vaziyetni eyileştirüvniñ kefili ola, amma buña yönelgen tedbirlerni keçirecek taraf degil, dep ayttı Rusiye prezidentiniñ matbuat kâtibi Dmitriy Peskov RİA Novosti agentligine.

«Rusiye – zıddiyet tarafları celp etken bir memlekettir. Bu memleket zıddiyet taraflarını Minsk añlaşmalarına riayet etmege çağırdı. Lâkin Rusiye bu tedbirlerni amelge çekirecek bir taraf degil. Bu memleket kefil ola, faqat buña yönelgen adımlarnı atacaq bir memleket degil. Bizler bunı yapamaymız, çünki Rusiye bu zıddiyetniñ iştirakçisi olmay», – dedi Peskov.

Fevral 12-de Minskte Ukraina, Rusiye, Almaniya ve Frenkistan liderleriniñ Donbass zıddiyetiniñ al etilmesi boyunca muzakereleri olıp keçti.

Muzakereler neticesinde sentâbr ayında tizilgen Minsk añlaşmalarınıñ yerine ketirilmesi boyunca bir sıra tedbirler belgilendi. Bu vesiqanı kontakt gruppası imzaladı: Ukraina vekilleri, OSCE ve separatistlerniñ liderleri. Bundan ğayrı, Ukraina, Frenkistan, Almaniya ve Rusiye liderleriniñ bu tedbirlerge qoltutuv deklaratsiyası qabul etildi.

Böylece, fevral 15-te Ukraina şarqında ateş kesilmek kerek. Ukraina toprağınlan çetel ordular çıqarılmalı, ağır silâ çekilmeli. Bütün esirlerniñ azat etilmesi beklenile.

Fevral 12-de Avropa şurasınıñ prezidenti Donald Tusk dedi ki, Şura yañı iqtisadiy cezalarnı qabul etmese de, fevral 16-dan itibaren 19 insan ve 9 şirketke qarşı Ukraina vaziyetinden sebep ceza kirsetilecek.

XS
SM
MD
LG