Rusiyeniñ Qırımdaki Taqiqat komitetiniñ baş taqiqat idaresi bildire ki, Qırımda ğayıp olğan insanlarnıñ cinaiy işleri taqiq etile, lâkin bir de bir neticeler aqqında aytmaq ertedir.
Bunı fevral 13-te Qırım Taqiqat komitetiniñ reberi Mihail Nazarov matbuat konferentsiyasında bildirdi, dep haber ete Qırım.Aqiqat.
Onıñ malümatına köre, «ğayıp olğan vatandaşlar boyunca» 12 cinaiy iş taqiq etilmekte. Onıñ qayd etkenine köre, olardan yalıñız dörtü – qırımtatarıdır.
«Ğayıp olğanlar arasında bütün millet vekilleri bar ve ekseriyeti qırımtatarlar degil», – dep ayttı Nazarov.
Cinaiy işler öldürüv ya da qaçıruv maddeleri boyunca açıldı.
Onıñ qayd etkenine köre, bunıñ kibi işlerniñ müddeti olmaz. «Olarnı noqta qoyulğanına qadar taqiq eteler», – dedi Nazarov.
Keçken sene devamında Qırımda bir qaç qırımtatarı ğayıp oldı: Timur Şaymardanov (mayıs 26-da), Seyran Zinedinov (mayıs 30-da), İslâm Cepparov ve Cavdet İslâmov (sentâbr 27-de), Eskender Apselâmov (oktâbr 3-te).
Qırımnıñ Taqiqat komiteti beş cinaiy işni açtı, lâkin bu adamlarnıñ bulunuv yeri aqqında iç bir malümat yoq.
Keçken seneniñ dekabr ayında qırımtatar halqınıñ lideri Mustafa Cemilev Avropa parlamentinde Rusiyeniñ Qırım işğali devamında qırımtatar halqınıñ 18 temsilcisi ğayıp olğanını bildirdi.
