Qırım yeudi teşkilâtları Estoniyada Holokost mevzusında açılğan «Poloniyam. Hatırlap ve unutıp» serlevalı sergini tarik olaraq adladılar.
Bu aqta Qırım.Aqiqatta olğan beyanatta aytıla.
Yeudi teşkilâtlarnıñ temsilcileri facialı vaqialarnıñ aksi o derecede külünçli sürette kösterilgeninden açuvlana.
Beyanatta aytıla ki, ressamlar «holokost» yazısını Gоllivud qırları, idam ögünde şen-şeramet ile oynağan çıplaq insanlarnıñ fonunda tasvir ettiler.
Mında şunı da qayd eteler ki – işbu video ve resimlerniñ müellifleri – leh ressamlarıdır.
«Auşvitsniñ birinci mabüsleri 782 poloniyalı olğanını unuttılar, umumen ise 150 biñ insan elâk oldı. Holokostnıñ qabaatsız qurbanlarına nisbeten mizah yersizdir», – denile beyanatta.
Soñki malümatqa köre, işbu sergi qapatıldı.
