Ğarp ve Ukraina Qırım oğrunda küreşke devam etecek, amma bu küreş yuridik alanında olacaqtır.
Bunı «1+1» efirinde Ukraina tış işler nazirligi temsilcisi Yevgen Perebiynis bildirdi.
«Qırımnı kimse iç bir zaman unutmadı ve unutmaz – ve şimdi beyannamede Ukrainaniñ topraq bütünligi aqqında yazılğanı ğarp ve Ukraina Qırım oğrunda küreşine devam etecegini tasdiqladı, amma bu küreş Donbasstaki küreşten farqlı olacaq. Mında yuridik, uquqiy mehanizmleri işletilecek, şunıñ içün daa da çoq vaqıt kerek olur», – dedi Perebiynis.
Onıñ sözlerine köre, Qırım küreşine Ukraina islâatları yardım etmeli.
«Ukraina Avropa birligine yaqınca olsa, Qırım suali daa da qolay çezilir», – dedi Perebiynis.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
