Kreml Ukraina prezidenti Petro Poroşenkonıñ SİZOda bulunğan ukrain arbiy hızmetçisi Nadejda Savçenkonıñ azat etilecegi aqqında sözlerini red etti.
Rusiye prezidentiniñ matbuat kâtibi Dmitriy Peskov tünevinki Minsk körüşüvinde Savçenko meselesi ukrain tarafından añılğan edi, amma Rusiye iç bir şey vade etmedi, dep ayttı.
Peskovnıñ aytqanı kibi, prezident Putin ukrain vatandaşınıñ qabaatını mahkeme belgilecegini qayd etti. Rusiye yetekçisiniñ matbuat kâtibi şunı qayd etti ki, Frenkistan prezidenti François Hollande ve Almaniya kantseri Angela Merkel Savçenkonıñ azat etilmesi boyunca «kerçekten de söz yürsetken ediler», amma olarğa er şey añlatıldı eken.
Minskte «normand dörtniñ» muzakereleri bitkeninden soñ, Ukraina prezidenti Petro Poroşenko körüşüv neticesinde Savçenkonıñ taqdiri aqqında añlaşma qabul etilgenini ilân etti. Onı tibbiy teşkerüvden ve taqiqatnıñ ilk neticelerinden soñ azat etecekler, dedi Porşenko jurnalistlerge.
Faqat Savçenko adliyecileri onıñ azat etilecegine inanmaylar. Mark Feygin İnterfaksqa aytqanı kibi, «o, almaşuv cedveline kirmedi» ve ukrain arbiy hızmetçisine nisbeten cinaiy iş qapatılmaz.
SİZOda Nadejda Savçenko narazılıq açlıqnı ilân etti, açlığı endi 63 kün devam ete.
Rusiye akimiyeti Savçenkonı iyün 17 künü Lugansk civarında Rusiye jurnalistleriniñ ölüminde qabaatlay. Ukrain uçucısı qabaatnı red ete ve bundan evel separatistler tarafından zapt etilip, Rusiyege ketirilgenini bildire. Yanvarniñ soñunda Savçenkoğa nisbeten – sıñırdan qanunsız keçüv boyunca cinaiy iş açıldı. Moskva Basman mahkemesi fevral 10 künü uçucı Nadejda Savçenkonıñ tevqifini mayıs 13-ne qadar uzatqan edi.
