«Normand formatında» keçirilgen Minsk sammiti Ukraina topraq bütünligini ve Qırım ukrain territoriyası olğanını tasdiqladı.
Bunı Twitterde Ukrainanıñ AQŞdaki elçisi Aleksandr Motsik bildire.
«Normand formatında keçirilgen Minsk sammiti Ukraina mustaqilligi ve topraq bütünligine, demek Qırımnıñ ukrain territoriyası olğanına ürmetni tasdiqladı», – dep yazdı o.
Fevral 12 künü keçirilgen muzakerelerni izaatlağan Ukraina tış işler nazirliginiñ temsilcisi Yevgen Perebiynis «beyannamede Ukrainanıñ topraq bütünligi aqta yazılğanını» bildirdi, bu ise Ukraina ve ğarp Qırım oğrunda küreşine devam etecegini isbatlay.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
