Rusiye Moskva ve Sankt-Peterburg şeer studentleri Ukraina studentlerine videomuracaat yazdılar. İşbu video içtimaiy ağlarda peyda oldı. Mında Rusiye studentleri akimiyetniñ qomşu devletke nisbeten etken areketlerinden utanğanını bildireler.
«Memleketimizniñ Ukrainanıñ ürmet etecek topraq bütünligini bozğanı ve Qırım yarımadasını işğal etkeni ayıptır. Ukraina vatandaşları qanunsız sürette Rusiye apishanelerinde bulunğanı ayıptır, bizni bağışlañız», – deyler studentler.
«Memleketimiz arasında büyük uçurım bar, ve biz – studentler, yaş nesil şu uçurımdan köpür olacaqmız. Matbuat vastalarınıñ yalan aqımı soñsuzdır, cemiyetteki nefret ve istilâ derecesi artmaqta, tüşünmek, teşkermek ve şübelenmege er kes azır degil eken, amma biz siznen bir taraftamız, çünki informatsion cenkte aqiqat tarafını almamaq mümkün degil», – dep muracaat eteler Rusiye studentleri.
Yanvarniñ soñunda Ukraina studentleri Rusiye studentlerine video yazıp, Rusiye matbuat vastalarınıñ malümatını teşkermege çağırdılar. Video yazuvda Kiyev aliy oquv yurtlarınıñ studentleri iştirak etti. Buña sanki dersiñ Rusiye studentlerinden cevap kele. Mında ukrainliler Donbass cenki meselesinde yañlışalar degen fikir yanğırağan edi. Öz muracaatında olar Rusiye matbuat vastalarından sıq işletilgen ıstılalarnı qullanalar. Yani: «Ukrainada vatandaşlıq cenki», «qanunsız avdarma», Qırımda «nezaketli insanlar» ve ilâhre.
