Ukraina ükümeti Donetsk vilâyeti devlet memuriyetine fevral 10-da Kramatorsk şeerine açılğan ateş aqibetlerini yoq etmek içün 5 mln grivna ayırdı. Ukraina Nazirler Şurasınıñ matbuat hızmeti bildire ki, böyle bir qarar fevral 12-de qabul etildi.
Maliye nazirligine devlet bücetiniñ yedek fondundan para bermege avale etildi.
Donetsk vilâyetiniñ devlet memuriyeti bir afta içinde alâqası olğan nazirlikler ile masraflarnıñ miqdarını belgilep, 2015 senesi noyabr 30-na qadar paranı sarf etüv esabatını bermeli.
Fevral 10-da Donetsk vilâyetiniñ Kramatorsk şeerinde raketa ücümi neticesinde altı bala zarar kördi. Prezidentniñ bala aqlarından vekâletlisi Nikolay Küleba bildirdi ki, olardan dörtü Kramatorsknıñ tibbiy müessiselerinde buluna.
İlk malümatlarğa köre, boyevikler tarafından Kramatorskqa açılğan ateş neticesinde 15 insan elâk oldı ve 63 kişi yaralandı.
