Moskvanıñ Basman mahkemesi cumaaqşamı künü, fevral 12-de, qırımtatar halqınıñ lideri Mustafa Cemilevge Rusiyege kirmege izin bermeyip, oña Qırımğa kiriş yasağı boyunca mahkeme toplaşuvında iştirak etmege imkân bermedi.
İTAR-TASS bildirgenine köre, mahkeme Federal migratsion hızmetiniñ Mustafa Cemilevniñ Rusiyege kiriş yasağı aqqında qararını lâğu etmedi. Mahkeme qararında aytıla ki, «Federal migratsion hızmetiniñ işbu qararınıñ yerine ketirilmesi mahkeme qararınıñ amelge keçirilmesine keder etmeycek».
Mahkeme imayege Mustafa Cemilevniñ Rusiyege kiriş yasağı aqqında vesiqasını da migratsion hızmetten aluv muracaatını qabul etmedi.
«Mahkeme bu qararnıñ sebebi olaraq FMH vekilleri böyle bir qarar alınmağanları aqqında mahkemede aytqanlarını aydınlattı. Bundan ğayrı, cevap bergenler dediler ki, böyle bir qararlar Federal migratsion hızmetine ait degil, çünki olar havfsızlıq ve cemaat nizamınıñ temini maqsadı ile qabul etile», – aytıla beyanatta.
Qırımtatarlarnıñ lideri Mustafa Cemilevniñ Qırımğa kiriş yasağı aqqında qarar boyunca şikâyeti Moskvada yanvar 22-de baqılması kerek edi, lâkin mahkemeci hastalanğanından sebep onı fevral 12-ne qaldırğan ediler.
Mustafa Cemilev davanı qazanacağından emin degil, lâkin bu iş Qırımnıñ qaytarılmasına fayda ketirecegine ümüt ete.
2014 senesi mayıs ayında Mustafa Cemilevge Rusiye işğal etken Qırımğa kirmege yasaq ettiler.
