Qırım ve terrorizmge qarşı tedbirler alanından mecburen köçip kelgenlerniñ sayısı 1 million 24 biñ adamnı teşkil etti. Böyle raqamlar fevral 12-de Ükümet evinde memleket içinde köçip kelgenlerniñ qoruma meseleleri boyunca toplaşuvda aydınlatıldı.
Baş nazir muavini Vâçeslav Kirilenkonıñ matbuat hızmeti bildire ki, toplaşuvda «köçip kelgenlerge qoltutuv ve olarnıñ aq-uquqlarını temin etüv ükümetniñ ayrı nezareti altında olğanı» qayd etildi.
«Memleket içinde köçip kelgenlerniñ sayısı artmaqta. Bizim vazifemiz – bu adamlarğa maddiy ve turmuş meselelerni al etmege yardım etmektir», – dep qayd etti Vâçeslav Kirilenko.
Matbuat hızmeti qayd etti ki, Regional inkişaf, qurucılıq ve mesken-kommunal hocalıq nazirligi köçip kelgenlerniñ yaşaması içün mesken olaraq qullanıla bilecek inşaatlar cedvelini azırlay.
