Qırım mahkemeleri topraq «samozahvatlarında» qanunsız sürette qurulğan inşaatlarnıñ yoq etilmesi aqqında 150-ge yaqın qarar çıqardı. Bunı fevral 12 künü Qırımda mahkemecilerniñ federal hızmetiniñ idare reisi Stanislav Krısin bildirdi, dep haber ete Krıminform saytı.
Krısin şunı da qayd etti ki, işbu qararlarnıñ amеlge keçirilüv ketişatı ğayet zordır. Bundan evel itiraz bildirüv basamaqları keçirilmeli.
«Bundan soñ ise saiplerge şu inşaatlarnı öz başına devirmege teklif etecekmiz, böyle imkân olmasa – yerli memuriyetlerge muracaat etecekmiz, işte, bu kibi qararlarnıñ teşebbüsçileri olğan olardır», – dedi o.
Yañı yılnıñ başında Qırımnıñ öz başına ilân etilgen akimiyeti yarımadada «samozahvatlarnıñ» meselesi bütünley çezilecegi aqqında bildirgen edi.
Qırımtatar Milliy Meclis reisi Refat Çubarov Qırım akimiyetiniñ işbu niyeti yarımadada işğalden soñ peyda olğan rusiyelilerniñ maddesi ve istegi ile bağlı olğanını tüşüne.
