Aqmescitniñ Kiyev rayon mahkemesi fevral 11 künü Ahetm Çiygoznıñ tevqif müddetini 2015 senesi mayıs 19-na qadar uzattı. Amnesty International uquq qoruyıcı teşkilâtınıñ beyanatında aytılğanı kibi, Çiygoznıñ yaqalanuvı Qırım akimiyeti tarafından «qırımtatar cemiyetini qorquzuv siyasetiniñ nevbetteki aksi»dir.
«Qırımtatarlarğa nisbeten artqan ayırım şaraitlerinde bu qarar yalıñız Ahtem Çiygozğa degil de, öz ukrain noqtaiy nazarını bildirgen ve yarımadanıñ Rusiye işğaline qarşı çıqqan er keske bağlı»,– dep bildirdi Amnesty International Moskva ofisiniñ reisi Sergey Nikitin.
Amnesty International eyyetiniñ azası Qırımda Qırımtatar Milliy Meclis temsilcileri ve Ahtem Çiygoznıñ apayı Elmira ile körüşti.
«Çiygoznıñ işini alıp barğan adliyecige mahkeme toplaşuvı aqqında Aqmescitniñ rayon mahkemesinde olacaq toplaşuvdan 4 saat evel bildirdiler. Adliyeci diger şeerde bulunğanı sebebinden, Çiygoz qoruv aqqından marum qaldı. Fevral 6 künü Çiygoznı vaqtınca bulunuv izolâtorından SİZOğa avuştırdılar, ne adliyeci, ne tuvğanlarına haber etmediler», – denile beyanatta.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti.
Ukraina baş prokuraturası Çiygoznıñ qanunsız sürette azatlıqtan marum etilgeni boyunca cinaiy işni açtı.
