Qırımtatar Milliy Meclis reisi Refat Çubarov ve Ukraina prezidentiniñ qırımtatar halqınıñ işlerinden vekâletlisiniñ temsilcileri Ukraina tasil ve ilim nazirliginiñ mütehassıları ile Ukrainada qırımtatar tasiliniñ inkişafını muzakere ettiler.
Bunı vekâletliniñ matbuat hızmeti bildire.
Körüşüv devamında qırımtatar tili, edebiyatı ve ahlâq boyunca kitaplarnıñ derc etilmesi, qıtaiy Ukrainada tuvğan tilniñ ögrenüvi ile sınıflarnıñ açılması, işğal etilgen Qırım mekteplerini bitirgen talebelerge ukrain attestalarnıñ berilmesi, Ukraina aliy oquv yurtlarında devlet bücetine tasil ve ukrain diplomlarnıñ alınması ve çetel aliy oquv yurtlarında oquv meseleleri muzakere etildi.
«Ukraina Tasil ve ilim nazirligi Qırımtatar Milliy Meclisi ve Ukraina prezidentiniñ qırımtatar halqınıñ işlerinden vekâletlisi ile qırımtatarlarnıñ aqlarını temin etmek meselesinde umumiy munasebetlerniñ inkişafına azır», – denile beyanatta.
Körüşüvniñ neticeleri aqqında tafsilâtlı malümatnı birazadan bildirmege vade eteler.
