Qırım müftiyatı siyasetçi ve cemaat erbaplarını Aqmescitte Cuma Cami qurucılığı mevzusında mühtekirlik yapmamağa çağırdı. Qırım musulmanları Diniy idaresiniñ matbuat hızmeti bildirdi ki, bu mesele QMDİ tarafından baqılmaqta.
«Qırım musulmanları Cuma Caminiñ yerini çoqtan belgilediler ve Qırım musulmanları tarafından Yaltinskaya, 22 adresine ketirilgen yüz seksen biñ taş bunı tasdıqlay. Bundan ğayrı, bu mesele Qırım akimiyeti ile muzakere etildi ve kün tertibinden alındı... Ve, konstruktiv ya da progressiv leyhalar olmasa, haberlerde olmaq içün Cuma Cami qurucılığı mevzusını kötermek doğru bir şey degildir, bu adamnı yaraştırmaz», – dep izaatladı Qırım Müftisiniñ muavini Ayder İsmailov «Qırım Birligi» cemaat teşkilâtınıñ reisi Seytumer Nimetullayevniñ Cuma Cami ava limanı tarafında qurulmaq kerekligi aqqında laflarını.
Müfti muavininiñ fikirince, bunıñ kibi laflar Qırım musulmanlarınıñ kederini doğurıp, cemaat arasında istiqrarnı bozmaqta.
«Bizler bütün siyasetçi, cemaat erbaplarını Qırım sakinleriniñ eşqına areket etmege çağıramız. O, musulman, qırımtatarı olsa, ya da kendini böyle tanıtsa, demek ki, musulman, qırımtatarlarnıñ menfaatlarını köz ögüne almalı. Bizler istiqrar faktorı olmaq kerekmiz, bu yarımadamıznıñ sakinlerine, cumhuriyetimizge kerek. Bunıñ kibi beyanatlar cemaatnı raatsızlay, Qırım musulmanlarını kederlete... Uzun zamandır Qırımdan tış çalışqan siyasetçi vaziyetni bilmeydir, çünki Aqmescit şeer şurasınıñ sıñırında tahminen 28 biñ musulman yaşamaqta ve 30-40 biñ insannı sığdıracaq cami aqqında aytmaq mantıqsızdır», – dep ayttı Ayder İsmailov.
Onıñ bildirgenine köre, birisi Aqmescitniñ diger qısmında cami qurmaq istese, Qırım musulmanları Diniy idaresi leyhanı baqmağa azır. «Qırım birligi» cemaat teşkilâtınıñ reisi Seytumer Nimetullayev dedi ki, Aqmescitte Cuma Cami qurucılığına ayırılğan topraq damartısı bunıñ kibi diniy inşaatına kelişmey.
