Ukraina tarafından kirsetilgen Qırım ile sıñır rejimi onı Rusiye Federatsiyasınıñ subyekti olaraq tanılmasına teñ kelmekte. Bunı Qırım yolbaşçısı Sergey Aksönov ayttı, dep haber ete ükümetniñ matbuat hızmeti.
«Bizim içün bu Rusiye Federatsiyasınıñ subyekti olaraq tanılması, uzun zamandır ukrain siyasetçileri problem çıqarğan meselelerniñ yoq etilmesidir. Devlet sıñırı tiklenecek, olar onı, niayet, tanırlar, keregi kibi vesiqalar resmiyleştirilecek. Biz buña qoltutamız, böyle olması kerek», – dedi Aksönov.
Sergey Aksönovnıñ aytqanına köre, Qırım Ukraina tarafından yapılğan areketlerge alıştı. «Rejimni kirsetecek olsalar, demek ki, alışacaqmız, biz farqlı devletlerde yaşaymız da», – dep qayd etti o.
Ukraina ükümeti fevral 10-dan itibaren Qırımğa yaqın olğan rayonlar ile sıñır rejimini kirsetip, Ukraina milliy havfsızlıq derecesini arttıracaq ola. Bu aqqında Nazirler şurasınıñ «Ukraina milliy havfsızlıq derecesi arttırılmasınıñ bazı meseleleri» aqqında qararında aytıla.
Aynı bu maqsat ile dekabr ayında Qırım ile demir yol ve avtobus alâqaları toqtatılğan edi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
Qıtaiy Ukraina ve yarımada arasında memuriy aytılsa da – tam bir sıñır peyda oldı. Qırım vaqtınca işğal etilgen topraq olaraq ilân etildi.
