Qırımda ukrainca çıqqan «Krımska svitlıtsâ» gazetası yalıñız elektron şekilde olacaq, dep haber etti Milliy gazeta mecmua neşriyatınıñ baş müdiri Roman Ratuşnıy Radio Svobodağa.
«Onı («Krımska svitlıtsâ» gazetasını – muar.) kimse qapatmaycaq. Bu laf qaydan çıqqanını bilmeyim. O, elektron şekilde olacaq. Yalıñız «Krımska svitlıtsâ» bastırılmasına degil, diger neşirlerge de para yoq», – dedi Ratuşnıy.
Neşirciniñ aytqanına köre, esas mesele para degil, gazetanı işğal etilgen topraqqa ketirmek imkânsızdır. Yanvar 1-den itibaren Qırım akimiyeti bütün kütleviy haber vastalarınıñ ğayrıdan qayd etilmesini istey, «Krımsoyüzpeçat» gazetanı tarqatmağa istemey, GP «Pressa» ve «Novaya poçta» onı kirsetemeyler, dedi o.
«Bir de bir insan neşirge para bermege azır olsa, ne içün olmasıñ? Yarımadağa kirsetmek – esas mesele budır. Bizler gazetanı almağa istegen abuneciler ile ne yapacağımıznı tüşünemiz. Bu pıtraqlı bir meseledir. Muarririyet Aqmescitte. Bizler baş muarrirge Herson ya da Nikolayev vilâyetine avuşmağa teklif etken edik, lâkin o istemedi. Olar anda gizli-gizli kibi çalışalar, işğalci hızmetler olarğa, eñ azından, iddiada buluna bileler», – dep ayta Ratuşnıy.
2015 senesi «Krımska svitlıtsâ» gazetasına 200 insan abune oldı.
