Bağçasarayda Qırımtatar Milliy Meclisiniñ azası ve Mustafa Cemilevniñ ortağı İlmi Ümerovğa Ahtem Çiygozğa qoltutuv mitingini keçirmege yasaq ettiler.
Bunı Ümerov Facebook saifesinde yazdı.
«Bugün Bağçasaray şeeriniñ memuriyetinden Ahtem Çiygozğa qoltutuv mitinginiñ keçirilmesi aqqında arizağa menfiy cevap aldım... Ariza ve cevap – ilâve olaraq», – dep yazdı Meclis azası.
Resmiy cevapta aytıla ki, miting keçirilmesine izin berilmey, çünki «muracaatta qayd etilgen malümat Federal Qanunlar belgilegen tedbir aqqında haber talaplarına uymay».
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.
Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti.
Ukraina baş prokuraturası Çiygoznıñ qanunsız sürette azatlıqtan marum etilgeni boyunca cinaiy işni açtı.
