Qırımda kenar imayesiniñ brigadası terkibinde Rusiye askerleriniñ talimleri keçirilmekte. Talimlerde 600 asker ve 50 dane cenk tehnikası iştirak etmekte.
Bunı Rusiye Qara deñiz flotunıñ vekili Vâçeslav Truhaçev bildirdi.
Salı künü Rusiye cenübinde cenk istihbaratı ve mahsus taqımlarnıñ büyük alan talimleri başlandı. Mında eki biñ asker ve 200 dane tehnika iştirak ete. Talimler bir ay devam etip, Volgograd vilâyeti, Stavropol ülkesi, Çeçenistan, Dagestan, Adıgeya, Karaçayevo-Çerkessiya ve Şimaliy Osetiyada keçirilecek.
Keçken seneniñ baarinden itibaren Rusiye bir qaç büyük talimni keçirdi. Aprel ayında Ukraina ile sıñırda Cenüp ve Ğarp arbiy bölgeleri talimlerni keçirgen ediler. İyün soñunda Vladimir Putin Merkeziy arbiy bölge ordusınıñ teşkerüvini apansızdan ilân etti. Talimlerde 65 biñ arbiy hızmetçi iştirak etti. Sentâbr ayında «Şarq-2014» talimleri olıp keçti, 150 arbiy hızmetçi ve sekiz biñ dane cenk tehnikası qullanıldı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
