Aqşam, fevral 9 künü, Qurman raoynı Büyük Onlar qasabasında belgisiz şahıslar camige sürip kirdi. İane seyfini açıp, paranı alıp qaçtılar.
Bunı Qırım musulmanları diniy idaresiniñ matbuat hızmeti bildire.
Büyük Onlar qasabasınıñ musulman diniy cemiyetiniñ reisi Üsein Kirimov aytqanı kibi, iane seyfinde 3 afta devamında toplanılğan 3-4 biñ ruble bar edi.
Çaypav aqşam ve yatsı namazları vaqtında, yani bir 45-60 daqiqa arasında yüz berdi. Cami şu vaqıtta er vaqıt açıqtır. Biz camini saba namazından soñ qapatamız ve aqşam namazına açamız, soñra ise yatsı namazına qadar qapatmaymız. Cinayetçi aselet bu vaqıtnı bekley edi, ğaliba», – dep tüşüne o.
Yerli musulman diniy cemiyetiniñ reisi aytqanı kibi, camide ne qaravul, ne de nezaret kameraları bar.
QMDİ malümatına köre, camige Qurman rayonı boyunca Rusiye İçki işler nazirliginiñ taqiqat taqımı çağırıldı, protokol tizildi.
Qırım İçki işler nazirliginde qayd etilgeni kibi, teşkerüv neticesinde cinayetçini yaqalamaq içün zaruriy tedbirler keçirilecektir.
Kirimov aytqanına köre, camide bu kibi adise endi dört yıl evelsi yüz bergen edi. O vaqıt cinayetçi tapıldı, qasaba sakini edi.
