Link açıqlığı

Aqmescitte yaqalanğan Qırımtatar Milliy Meclis reisiniñ muavini Ahtem Çiygoznıñ apayı Elmira Ablâlimova adliyecige onıñ ömür arqadaşını tapmağa rica etti. Uquq qoruyıcılar yaqalanğannıñ tuvğanlarına onıñ bulunuv yerini endi beşinci kün aytmaylar ve körüşmege de fırsat bermeyler.

Qırım.Aqiqatqa Elmira Ablâlimova aytqanı kibi, o, şimdilik yalıñız aqayınıñ Aqmescitte olğanını bile.

Onıñ sözlerine köre, adliyeci Emil Kürbedinov taqiqatçıdan tafsilâtlı malümatnı ögrenmege areket etti, amma neticesiz. Oña, Çiygoznıñ tuvğanlarına kibi, bir şey aytmaylar.

«Bugün adliyeci barıp, Ahtemniñ bulunuv yeri, şaraitlerini ögrenmege tırıştı. Amma Taqiqat komitetiniñ teşkerüvi keçirilgeninden sebep, onıñ taqiqatçı ile körüşüvi olmadı», – dey Ablâlimova.

Qadın ömür arqadaşı beş kün aş ve sigarsız olğanı sebebinden qasevet çeke. Onıñ sağlığını ve köre bilecek zararını tüşüne.

Salı künü, fevral 10-da, Aqmescit SİZOlarında yaqalanğanlar içün yollanmalarnı qabul eteler. Elmira Ablâlimova aqayına zaruriy şeylerni berip olacağına ümüt besley.

Qırımtatar Milliy Meclis reisi Refat Çubarov Qırım akimiyeti onıñ yaqalanğan muavini Ahtem Çiygoznıñ iradesini bozmaq içün arket etkenini tüşüne. Çubarov emindir ki, şimdi Çiygoz SİZOda kendi başına buluna.

Malüm ki, Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Mahkeme yanvar 29 künü Aqmescitniñ Kiyev rayon mahkemesiniñ alğan qararını lâğu etmedi. Oña köre, Çiygoz fevral 19-na qadar apiste bulunmalı.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Ukraina baş prokuraturası Çiygoznıñ qanunsız alda azatlıqtan marum etilgeni boyunca cinaiy işni açtı.

XS
SM
MD
LG