Link açıqlığı

Qırımtatar Milliy Meclis reisi Refat Çubarov Qırım akimiyeti onıñ yaqalanğan muavini Ahtem Çiygoznıñ iradesini bozmaq içün arket etkenini tüşüne.

Bunı o öz Facebook saifesinde bildirdi.

Çubarov emindir ki, şimdi Çiygoz SİZOda kendi başına buluna.

«Bese-belli ki, Taqiqat komitetine ve şu cümleden taqiqatçı Azizov Bulat Ravilyeviçke (qazan tatarı) Ahtem Çiygoznıñ iradesini bozmaq, onıñ tuvğanlarını ise, Ahtemniñ bulunuv yerini aytmayıp, çekiştirmek kibi vazife qoyuldı», – dep yazdı Meclis reisi.

Eki kün devamında Çiygoznıñ tuvğanları onıñ bulunuv yeri aqqında bir şey bilmey ediler.

Malüm ki, Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Mahkeme yanvar 29 künü Aqmescitniñ Kiyev rayon mahkemesiniñ alğan qararını lâğu etmedi. Oña köre, Çiygoz fevral 19-na qadar apiste bulunmalı.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Ukraina baş prokuraturası Çiygoznıñ qanunsız alda azatlıqtan marum etilgeni boyunca cinaiy işni açtı.

XS
SM
MD
LG