Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ fikrine köre, Rusiyede makeme etilgen uçucı Nadejda Savçenkoğa açlıqnı toqtatmağa lâzim.
Bunı o Ukrinform neşirine bildirdi.
«Nadâ yapacağını yaptı. Menimce, şimdi toqtalmaq kerek, çünki Rusiye – istilâcıdır, insaniy printsiplerge riayet etken bir memleket degildir», – dedi o.
«Azatlıqqa çıqıp, Rusiyege diger usullar ile qarşılıq köstermek içün sağlıqnı qorumaq kerek», – dedi Cemilev.
O, Savçenkonıñ qapaluvı uzun zamanğa sürmeycegine ümüt besley, Ukrainada esirlerni deñiştirip, onıñ azatlığını talap etecektirler.
Moskva apishanesinde bulunğan uçucı Nadejda Savçenko endi 59 kün açlıq tuta. Rusiye akimiyeti onı Lugansk civarında iyün 17 künü Rusiye telekanalınıñ eki hadiminiñ ölüminde qabaatlay. Savçenko bu qabaatlarnı red ete ve separatistler tarafından bu vaqiadan evel zapt etilgenini bildire.
