Link açıqlığı

Türkiye qırımtatar teşkilâtları Qırımnıñ Rusiye tarafından zaptını «ekinci işğal» olaraq adladılar. Bu aqta 42 teşkilâtnıñ mütenasip beyanatında aytıla.

Bunı Türkiye tış işler nazirliginiñ matbuat hızmeti bildire.

«Qırım qırımtatarlarnıñ tarihiy ve yekâne Vatanıdır. Rusiye Federatsiyası tarafından Qırımnıñ ekinci işğali qanunsızdır ve iç bir vaqıt tanılmaz bir şeydir. Rusiye Federatsiyası işbu qanunsızlıqnı toqtatmaq kerektir», – dep aytıla beyanatta.

Vesiqada qayd etilgeni kibi, mezkür teşkilâtlar qırımtatarlarnıñ aqlarını ve Ukraina topraq bütünligini qorçalamağa azırlar.

Bundan evel Türkiye tış işler naziri Mevlüt Çavuşoğlu Rusiye Türkiyege qırımtatarlar ile bağlı vadelerni yerine ketirmegenini ayttı. Rusiye prezidenti Vladimir Putinniñ Türkiye ziyareti vaqtında, Çavuşoğlunıñ aytqanına köre, Qırım meselesi muzakere etilgen edi. Rusiyege qırımtatarlarğa yapılğan basqı ile bağlı bütün qorqular yetkizildi.

Çavuşoğlunıñ aytqanına köre, Vladimir Putin Qırımğa resmiy Türkiye eyyetini kirsetmege razı oldı. İşbu eyyet qırımtatar halqınıñ vaziyetini ögrenecek. Türkiye eyyeti eñ yaqın vaqıtta Qırımğa yol alacaq, dep ayttı Çavuşoğlu.

Bu seneniñ başından Qırımda endi bir qaç qırımtatar faalini yaqalağan ediler, şu cümleden Meclis azaları da. Sinaver Kadırovnı yarımadadan mahkeme qararı ile sürgün ettiler. Bundan evel Qırımğa Mustafa Cemilev ve Refat Çubarovğa kiriş yasaq etilgen edi.

XS
SM
MD
LG