Link açıqlığı

Çubarov: qırımlılarnıñ Rusiyeniñ bir qısmı olmaq istekleri aqqında taqdim etilgen tedqiq – Kreml içün elverişlidir


Qırımtatar Milliy Meclisiniñ reisi Refat Çubarov GfK Ukraine Şirketiniñ qırımlılarnıñ Rusiyeniñ bir qısmı olmaq istekleri aqqında tedqiğini tenqit etti.

«GfK Ukraine ekspertleri saylağan telefon vastası ile sorav usulınıñ zararını añlamadılar, dep tüşünmeyim, lâkin, tedqiq içün berilgen paranı elde etmek istegi daa da küçlü oldı, demek. Neticede, – Lavrov ve Kremlniñ diger hızmetçileri quvana-quvana şübeli tedqiqniñ neticeleri aqqında aytalar...», – dep yazdı Facebook saifesinde Çubarov.

GfK Ukraine Şirketi «Qırım sakinleriniñ içtimaiy-siyasiy keyfleri» mevzusında keçirilgen içtimaiy tedqiq neticelerini taqdim etti. Keçirilgen sorav neticelerine köre, qırımlılarnıñ 82 fayızı Rusiye terkibine qoşulmasına qoltuta.

GfK Ukraine hadimleri soravnı telefon vastası ile keçirdiler, bir sıra ekspert bu usuldan faydalanıp tam malümat almağa mümkün olğanından şübelengenini ayttı. Ukraina içtimaiyatçıları ve siyasetşınaslarınıñ fikirince, cumhuriyet ealisi qorqa, ve işğalge qoltutmağan qırımlılar telefonda kerçek fikirini bildirmekten saqına bileleler.

XS
SM
MD
LG