Link açıqlığı

Meclis reisiniñ yaqalanğan muavini Ahtem Çiygoznıñ tuvğanları onıñ ile bağlanıp olamaylar


Qırımtatar Milliy Meclis reisini muavini Ahtem Çiygoznı keçken afta Aqmescitniñ vaqtınca bulunuv izolâtorından çıqarğan ediler. Şimdi bulunuv yeri alâ daa belgisizdir.

Bunı Qırım.Aqiqat saytına Çiygoznıñ apayı Elmira Ablâlimova bildirdi.

Onıñ aytqanı kibi, Ahtem Çiygoznıñ tuvğanları oña evden ketirilgen şeylerni berecek oldılar, amma izolâtor hadimleri onıñ anda olmağanını bildirdiler.

«Fevral 6 künü, soñra 7 ve 8 künleri taqiqatçığa telefon ete edim, amma o cevap bermey edi, ömür-arqadaşımınıñ bulunuv yerini, sağlığını soraycaq edim», – tarif ete Ablâlimova.

Meclis reisiniñ muavini Çiygoznıñ bulunuv eri bazarertesi künü üylede belli oldı.

«Bugün taqiqatçı Azizov Bulat Ravileviçke telefon etip oldım. Onı SİZOğa ketirdiler, dep ayttı, amma qaysı şeerde olğanını bildirmedi. Onıñ ile şahsiy körüşüvge kelip, aqayımnıñ bulunuv yerini ögrenmege rica etti», – dep añlattı Çiygoznıñ ömür-arqadaşı.

Onıñ fikrine köre, işbu cinaiy işni alıp barğan taqiqat organları «Cinayet etüvde şeklengen ve qabaatlanğanlarnıñ apiste bulunuvı aqqında» federal qanunını bozğanlar.

«Qanunda yazılğanı kibi, cinaiy işni alıp barğan organlar qabaatlı ya da şekli insannıñ tuvğanlarına onıñ bulunuv yeriniñ deñiştirilmesi aqqında bildirmek kerektirler», – dedi Ablâlimova.

Şimdi, onıñ aytqanı kibi, soy-sopları Ahtem Çiygoznıñ bulunuv yerini ögrenmege areket eteler.

Malüm ki, Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Mahkeme yanvar 29 künü Aqmescitniñ Kiyev rayon mahkemesiniñ alğan qararını lâğu etmedi. Oña köre, Çiygoz fevral 19-na qadar apiste bulunmalı.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Ukraina baş prokuraturası Çiygoznıñ qanunsız alda azatlıqtan marum etilgeni boyunca cinaiy işni açtı.

XS
SM
MD
LG