Zaporojye şeer başçı Оleksandr Sın tatilge çıqıp, Terrorizmge qarşı ameliyat zonasına göñülli olaraq ketti. Bunı o, öz Facebook saifesinde bildirdi.
«İç bir şey yazmaycaq edim, amma dostlarım israr ettiler. Suallerge cevap, – dedi Sın. – Ne içün şimdi tatilge çıqam? Çünki ferval eñ sakin aylardan biridir: bayramlar bitti, bücet qabul etildi ve amelge keçirilmekte, qurucılıq daa başlanmadı (qış). ATOğa göñülli olaraq kettim ve bundan iç bir status, imtiyaz almaycam. Arbiy areketlerde iştirak etmeyim».
Sın haber etkeni kibi, o, göñülli olıp, er künlik meselelerni çezmege yardım ete, tehnikanı tamir ete.
«Zaporojyede şimdi olğan «şou» mından ne Zaporojye, ne Ukraina içün emiyetli olıp körünmey. Mında kelgende, qararım doğru olğanından emin oldım: askerlerimizge şahsen yardım etmege endi imkânım bar», – dedi o.
Belli olğanı kibi, bıltır dekabr ayında bazı siyasiy küçlerniñ tarafdarları Zaporojye yolbaşçısınıñ istifasını talap ete edi. Şu cümleden, yerli şeer şurasınıñ toplaşuvında Radikal firqasınıñ vekilleri şamata çıqarğan ediler.
