Almaniya kantsleri Angela Merkel ve Frenkistan prezidenti François Hollande Moskvada Rusiye prezidenti Vladimir Putin ile Ukrainanıñ şarqında barışıq olmasını beş saat muzakere ettiler, dep haber ete Radіo Svoboda.
Qısqa beyanatı ile Rusiye yolbaşçısınıñ temsilcisi Dmitriy Peskov çıqışta bulunıp, muzakerler neticesinde alınğan qararğa binayen, em Ukraina prezidenti Petro Poroşenkonıñ, em munaqaşa devamında Rusiye prezidentiniñ aytqanlarına riayet etecek Minsk añlaşmaları boyunca umumiy vesiqanıñ azırlanacağı aqqında bildirdi.
Spikerniñ aytqanı kibi, bazar künü devlet başları işbu vesiqanıñ azırlanuv neticelerini telefon vastası ile bildirecekler, işbu subette Ukraina, Rusiye, Almaniya ve Frenkistan memleketleri iştirak etecek eken.
Merkel ve Hollande Putinge ziddiyetniñ toqtatılması boyunca Kiyevde Poroşenko ile uyğunlaştırılğan tekliflerini aytıp berdiler. O körüşüvden soñ tış işler naziri Pavlo Klimkin körüşüv «yahşı keçkeni» aqqında bildirdi. Onıñ aytqanına köre, üç devletniñ reberleri «Minsk añlaşmalarını tolusınen çalıştıracaq adımlarnı muzakere ettiler».
