Almaniya kantsleri Angela Merkel ve Frenkistan prezidenti François Hollande cuma künü, fevral 6-da, aqşam Rusiyeniñ paytahtı Moskvağa keldiler. Olar Rusiye prezidenti Vladimir Putin ile körüşip, Ukrainanıñ şarqında barışıq olmasını muzakere etecekler.
Radio Svoboda bildire ki, olar Putinge zıddiyet toqtatılması boyunca yañı tekliflerni aydınlatmaq kerekler. Zıddiyet neticesinde 5 biñ 350 insan elâk oldı, halqara kerginlik «Suvuq cenkinden berli olmağan» derecege qadar arttı.
François Hollande Moskvağa yol almazdan evel Rusiyege barıp, Ukrainada zorbalıq toqtatılması aqqında añlaşmağa ümüt etkenini bildirdi. Angela Merkel dedi ki, Putin ile körüşüv barışıq olacağını kefil etmey.
Merkel ve Hollandeniñ teklifleri tafsilâtlıca aydınlatılmadı.
Berilgen malümatlarğa köre, olar keçken seneniñ sentâbr ayında tizilgen Minsk añlaşmaları ve Ukrainanıñ mustaqilligi ve topraq bütünligine esaslanmaqta.
Ukraina ve Ğarp Putinniñ şartlarına razı olacaq degen malümatlar red etildi.
Tünevin Almaniya ve Frenkistan reberleri Kiyevni ziyaret etip, prezident Petro Poroşenko ile körüştiler. Tış işler naziri Pavlo Klimkin körüşüv «yahşı keçkenini» bildirdi. Onıñ aytqanına köre, üç devletniñ reberleri «Minsk añlaşmalarını tolusınen çalıştıracaq adımlarnı muzakere ettiler».
