Link açıqlığı

Qırımda Meclis azası, Çiygozğa qoltutuv mitinginiñ teşebbüsçisine FSB hadimleri keldi


Bağçasaray rayon devlet memuriyetiniñ sabıq yolbaşçısı, Qırımtatar Milliy Meclisiniñ azası İlmi Ümerov

Bağçasaray regional Meclisiniñ toplaşuvında SİZOda bulunğan Meclis reisiniñ muavini Ahtem Çiygozğa qoltutuv mitingini keçirmege qarar alındı. Bunı Bağçasaray rayon devlet memuriyetiniñ sabıq yolbaşçısı, Qırımtatar Milliy Meclisiniñ azası İlmi Ümerov Facebook saifesinde bildirdi.

«Meclis emri ile tünevin men Bağçasaray şeer şurasınıñ reisi Sergey Marinskih adına Bağçasaraynıñ merkeziy meydanında fevral 19-da (Aqmescitniñ Kiyev rayon mahkemesiniñ qararına köre Ahtemniñ apisten azat etilmesi künü) miting keçirilmesi aqqında ariza berdim. Aynı bu künü evime Qırım Cumhuriyeti ve Aqyarda Rusiye Federal havfsızlıq hızmeti idaresiniñ Ekstremizm ile küreş merkeziniñ vekilleri keldi. Bu tedbir nasıl etip keçirilecegini soradılar. Tahminlerime köre, red etecekler», – dep bildirdi İlmi Ümerov.

Onıñ aytqanına köre, şeer şurasınıñ cevabı on küç içinde berilmeli.

Malüm ki, Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Mahkeme yanvar 29 künü Aqmescitniñ Kiyev rayon mahkemesiniñ alğan qararını lâğu etmedi. Oña köre, Çiygoz fevral 19-na qadar apiste bulunmalı.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Ukraina baş prokuraturası Çiygoznıñ qanunsız alda azatlıqtan marum etilgeni boyunca cinaiy işni açtı.

XS
SM
MD
LG