Şekerleme mahsulatı ile oğraşqan «Qırım sultanı» müessisesinde ofiste silâlı adamlar olğanını ve «devletleştirüv» keçirilgenini red eteler.
«İşhanemizde böyle bir şey olmadı, ne silâlı adamlar, ne de teşkerüvler bar, raat çalışamız», – dep ayttı müessise vekili Qırım.Aqiqatqa.
Bundan evel vaqia şaatları olğan adamlar Qırım.Aqiqatqa bildirdiler ki, fevral 5-te silâlı adamlar «Berejnoy» ve «Qırım sultanı» ofislerini sarıp aldılar. «Berejnoy» işhanesi de bu malümatnı red etti. Mında qayd etkenlerine köre, ofiste plan boyunca vesiqalarnı teşkerdiler, teşkergen adamlarnıñ yanında 4 silâlı hadim bar edi.
Soñki vaqıtları Qırımda silâlı adamlarnıñ yardımı ile müessiseler sıq-sıq devletleştirile.
Yaqında bunıñ kibi vaqialar Bağçasaray rayon istimalcılar birliginde olıp keçti. Onıñ işini bir qaç kün devamında blok etken ediler. Fevral 2-de mında silâlı adamlar keldi. Paycılarğa olarnıñ müessisesi artıq «Qırım ticaret şirketiniñ» bir qısmı olğanını haber ettiler.
