Link açıqlığı

FSB Zair Smedlâyevni sorğuğa çekemedi: qırımtatarca bilgen terciman yoq


Qırımtatar areketiniñ faali, Qırımtatar Milliy Qurultayı Merkeziy saylav komissiyasınıñ reisi Zair Smedlâyev

Cuma künü, fevral 6-da, Qırımnıñ Federal havfsızlıq hızmetinde (FSB) keçirilmesi belgilengen qırımtatar areketiniñ faali, Qırımtatar Milliy Qurultayı Merkeziy saylav komissiyasınıñ reisi Zair Smedlâyevniñ sorğusı keçirilmedi, çünki uquq qoruyıcılarnıñ qırımtatarcadan rusçağa çevirecek tercimanı yoq.

Zair Smedlâyevniñ Qırım.Aqiqatqa bildirgenine köre, o, sorğu başlanmazdan evel taqiqatçığa muracaatta bulunıp, suallerni qırımtatarca bermege rica etti.

«Men anayasa aqqımnı qullanmağa istedim. Qırım Cumhuriyetiniñ 10-uncı maddesi ve Rusiye Federatsiyası Cinaiy-protsessual kodeksiniñ 18-inci maddesi maña ana tilimde cevap bermege ve terciman hızmetlerinden bedava faydalanmağa imkân bereler», – dedi Smedlâyev.

Onıñ aytqanına köre, terciman yoq edi, şu sebepten sorğu keçirilmedi.

«Subetimiz fevral 10-da devam etecek», – dep qayd etti o.

Hatırlatamız, Qırımtatar Milliy Qurultayı MSK reisi Zair Smedlâyevni «mayıs 3» işi boyunca sorğuğa çekeler.

Smedlâyevniñ fikirince, FSB keçirecek olğan sorğu Rusiye akimiyetiniñ qırımtatarlarğa yapqan basqısını quvetleştirmek ıntıluvıdır.

Yanvar 19-da «mayıs 3» işi boyunca Edem Osmanov yaqalanğan edi. Yanvar 23-te FSB ve sıñır hızmetiniñ hadimleri «Ermeni bazar» kiriş noqtasında faal Sinaver Kadırovnı yaqalap, onı Qırımdan sürgün ettiler. Yanvar 29-da Qırımtatar Milliy Meclisi reisiniñ muavini Ahtem Çiygoz yaqalanıp apiske alındı.

XS
SM
MD
LG