İnsan aqları boyunca Avropa mahkemesine «Ukraina Rusiyege qarşı» eki devletlerara ve işğal etilgen Qırım boyunca 20-ge yaqın şahsiy şikâyet yollanıldı.
Bunı İnsan aqları boyunca Avropa mahkemesi kâtibiyetiniñ yuridik bölüginiñ başı Оlga Çernışeva ayttı, dep haber ete Dojd.
«Birincisi (devletlerara şikâyet – muar.) 2014 senesi mart ayından Qırım ve Ukraina şarqında yüz bergen adiseler ile bağlı», – tarif ete Çernışeva.
Onıñ sözlerine köre, bundan soñ aynı şu mesele boyunca tahminen 180 şahsiy şikâyet yollanıldı.
«Olardan bir yigirmi şikâyet Qırım ile bağlı. Mında bir sıra mesele köterile: yaşayış aqnıñ bozuluvı, insanlarnıñ ğayıp oluvı, sert munasebet, azatlıqtan marum etüv, matbuat vastalarınıñ sıñırlavı, mülk aqqınıñ bozuluvı ve ilâhre», – añlattı o.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
