Ukrainanıñ kino meseleleri boyunca devlet agentligi Rusiye tarafından çıqarılğan 20 filmni köstermege yasaq etti. Fevral 5-te Devlet kinosınıñ matbuat hızmeti bildire ki, bu qarar filmlerni kösterüv ve tarqatuv ekspertler komissiyasınıñ tevsiyelerine esaslanıp qabul etildi.
«Cedvelde 25 serial, film bar edi, olardan 20 danesini filmlerni kösterüv ve tarqatuv ekspertler komissiyası Ukrainada kino ve televideniyede, ticaret videosı, em de ev videosı olaraq yasaq etmege tevsiye etti», – aytıla beyanatta.
Yasaq etilgen film ve seriallar arasında – «Soldatı», «Smerş», «Gospoda ofitserı». Devlet kinosınıñ Facebook saifesinde bütün cedvel mevcut.
Malüm ki, 2014 senesi dekabr ayında Devlet kinosınıñ yanında olğan filmlerni kösterüv ve tarqatuv ekspertler komissiyası Rusiye oyuncısı İvan Ohlobıstinniñ iştiraki ile 71 film ve serialnı yasaq etti. Ohlobıstin Ukrainağa qarşı çıqqanını sıq-sıq seslendire.
Devlet kinosı Rusiye oyuncısı Mihail Poreçenkovnıñ iştiraki ile 69 filmni yasaq etti. O, 2014 senesi oktâbr ayında Rusiyege qoltutqan separatistlerniñ nezareti altında bulunğan Donetskke barıp kelgen edi.
